पुण्याच्या उच्चभ्रू परिसरात ‘हाऊस पार्टी’च्या आड रेव्ह पार्टी! पोलिसांची पहाटेची कारवाई; माजी मंत्र्यांच्या जावयासह सात जण अटकेत 

दिपसागर न्यूज ऑनलाइन पोर्टल सेवा:

पुणे : शहरातील उच्चभ्रू भाग म्हणून ओळखल्या जाणाऱ्या खराडी परिसरात ‘हाऊस पार्टी’च्या नावाखाली सुरू असलेल्या एका रेव्ह पार्टीवर रविवारी (दि. २७) पहाटे पुणे पोलिसांच्या गुन्हे शाखेने अचानक छापा टाकला. यावेळी मोठ्या प्रमाणात अमली पदार्थ, मद्य व हुक्का साहित्य जप्त करण्यात आले असून, दोन महिलांसह एकूण सात जणांना पोलिसांनी ताब्यात घेतले आहे. विशेष म्हणजे या अटकेत माजी मंत्री एकनाथ खडसे यांचे जावई प्रांजल खेवलकर यांचाही समावेश आहे.

स्टे बर्ड गेस्ट हाऊसमध्ये पार्टी, पोलिसांची गुप्त माहितीवरून कारवाई

खराडीतील स्टे बर्ड नावाच्या आलिशान गेस्ट हाऊसमध्ये या रेव्ह पार्टीचे आयोजन करण्यात आले होते. गुन्हे शाखेला मिळालेल्या गुप्त माहितीनंतर मध्यरात्री सुमारे साडेतीन वाजताच्या सुमारास छापा टाकण्यात आला. पोलिसांना आढळून आले की, ‘हाऊस पार्टी’च्या आड अमली पदार्थांचे सेवन व हुक्का सत्र सुरू होते.

माजी मंत्र्यांचे जावई अटकेत

या कारवाईत अटकेत घेतलेल्या व्यक्तींमध्ये राष्ट्रवादी काँग्रेसच्या नेत्या रोहिणी खडसे यांचे पती आणि एकनाथ खडसे यांचे जावई प्रांजल खेवलकर यांचा समावेश असून, त्यामुळे ही घटना अधिकच चर्चेत आली आहे.

पार्टीतून तीन तरुणी फरार

पोलिसांची चाहूल लागताच घटनास्थळावरून तीन तरुणी अंधाराचा फायदा घेत पसार झाल्या. पोलिसांकडून त्यांचा शोध सुरू असून, परिसरातील सीसीटीव्ही फुटेज व इतर तांत्रिक साधनांच्या मदतीने तपास सुरू आहे.

मोठ्या प्रमाणात अमली पदार्थ व मद्य साठा जप्त

पोलिसांनी घटनास्थळी गांजा, इतर अमली पदार्थ, विदेशी मद्याच्या बाटल्या, हुक्कासाठी लागणारे साहित्य असे मोठ्या प्रमाणावर बेकायदेशीर मुद्देमाल हस्तगत केला आहे.

शहरातील बेकायदेशीर पार्टी कल्चरवर पुन्हा प्रश्नचिन्ह

या घटनेमुळे पुन्हा एकदा पुण्यातील उच्चभ्रू वस्त्यांमध्ये सुरू असलेल्या बेकायदेशीर पार्ट्यांच्या वाढत्या प्रमाणावर आणि अमली पदार्थांच्या उपलब्धतेवर प्रश्नचिन्ह उभे राहिले आहे. या प्रकारामागे असलेल्या साखळीचा शोध घेण्यासाठी पोलीस सखोल तपास करत आहेत.