उमेदवार जाहीर होण्यापूर्वीच चेतन तुपेंकडून प्रचार? निवडणूक आयोगाचा दणका, रिक्षा पोलिसांकडून जप्त

पुण्याती हडपसरमध्ये अद्याप उमेदवार जाहीर करण्यात आला नाही. उमेदवार जाहीर करण्यात आला नसूनही आमदार चेतन तुपेंकडून प्रचार सुरू करण्यात आल्याचा आरोप करण्यात आला. याप्रकरणी पोलिसांनी प्रचारासाठी वापरलेल्या रिक्षा जप्त केल्या आहेत.

पुणे : विधानसभा निवडणुकीच्या पार्श्वभूमीवर उमेदवारांनी प्रचारासाठी कंबर कसली आहे. रविवारी भारतीय जनता पक्षाने ९९ उमेदवारांची पहिली यादी जाहीर केली. आता उमेदवार राष्ट्रवादी आणि शिवसेनेच्या यादीची प्रतीक्षा करत आहेत. दरम्यान पुण्यातल्या हडपसर या विधानसभेच्या जागेवर मोठा पेच असताना चेतन तुपे यांनी थेट प्रचार सुरू केला आहे.

दरम्यान निवडणूक आयोगाने दणका देत पुण्यात प्रचारासाठी वापरण्यात येणाऱ्या तीन रिक्षा जप्त केल्या आहेत. चेतन तुपे यांनीच आम्हाला प्रचार करण्यासाठी पैसे दिले असल्याची एक ऑडिओ क्लिप सध्या सोशल मीडियावर व्हायरल होत आहे. याबाबत पोलिसांकडून माहिती घेण्याचा प्रयत्न केला असता कोंढवा पोलीस स्टेशनचे वरिष्ठ पोलीस निरीक्षक विनय पाटणकर यांनी माहिती देण्यास टाळाटाळ केली.

हडपसर विधानसभा मतदारसंघात शिवसेना शहरप्रमुख नाना भानगिरे इच्छुक असताना त्यांनी मोठी ताकद त्या मतदारसंघात लावली आहे. आज स्थानिक नागरिकांनी पायी चालत एकनाथ शिंदे यांचा बंगला गाठण्याचा प्रयत्न केला. नाना भानगिरे यांची उमेदवारी फायनल करा, अशी विनंती स्थानिक नागरिक करणार आहेत. दरम्यान उमेदवार अद्याप फायनल नसला झाला, तरी देखील प्रचाराच्या गाड्या कशा काय फिरत आहेत? असा प्रश्न राष्ट्रवादी काँग्रेस शरद पवार गट पुणे शहर उपाध्यक्ष असिफ मौलाना शेख यांनी केला तसेच  वादळ व सामाजिक संघटनेचे अध्यक्ष रिपब्लिकन परीवर्तन सेना पश्चिम महाराष्ट्र अध्यक्ष शुभम जगताप इलीयाज बागवान सोनु शेख अविनाश कांबळे मयुर जगताप राजु कांबळे यांनी पहाटे ४ वाजेपर्यंत पोलिस स्टेशन येथे थांबुन निवडणूक आयोगाच्या अधिकाऱ्यांना वारंवार संपर्क करून  गुन्हा दाखल करुन घेतला

या सर्व पदाधिकारी व कार्यकर्ते यांनी पोलीस ठाण्यात तक्रार केल्याने प्रचारासाठी वापरलेल्या रिक्षा जप्त केल्या आहेत. याप्रकरणी पुढील तपास पोलीस करत आहे.   

चेतन तुपेंनी २०१९ मध्ये जिंकलेला हडपसरचा गड

चेतन तुपे हे हडपसर विधानसभा मतदारसंघाचे विद्यमान आमदार आहेत. २०१९ ला भाजपच्या योगेश टिळेकरचा पराभव करून त्यांनी हडपसरचा गड जिंकला होता. राष्ट्रवादी काँग्रेसचमध्ये उभी फूट पडल्यानंतर चेतन तुपे हे लोकसभा निवडणुकीपर्यंत तळ्यात मळ्यात होते. अखेर त्यांनी अजित पवारांसोबत जाण्याचा निर्णय घेतला आणि लोकसभा निवडणुकीमध्ये शिवाजीराव आढाळराव पाटील यांचं काम केलं, मात्र शिवाजीराव आढळराव पाटील यांचा पराभव झाला आणि हडपसर विधानसभा मतदारसंघांमधून देखील त्यांना लीड मिळू शकला नाही.

त्यामुळे चेतन तुपे यांनी अनेकदा शरद पवार यांच्याशी संपर्क साधण्याचा प्रयत्न केला. मात्र तरी सुद्धा त्यांना कोणताही प्रतिसाद मिळाला नाही. मात्र या जागेसाठी महायुतीमध्ये शिवसेना शहरप्रमुख नाना भानगिरे इच्छुक असल्यामुळे ही जागा कोणाला सुटेल याकडे सर्वांचंच लक्ष लागलं आहे. मात्र उमेदवार अद्याप निश्चित झाला नसूनही चेतन तुपे यांनी थेट प्रचाराला सुरुवात केल्याचं चित्र पाहायला मिळालं आहे.