धाराशिवमध्ये भाकरी फिरली! रणजीत पाटील ऐवजी राहुल मोटेंना तिकीट फिक्स; रणजीत पाटलांच्या भूमिकेकडे जिल्ह्यांचे लक्ष

दिपसागर न्यूज ऑनलाइन पोर्टल सेवा: 

भूम – परांडा विधानसभा मतदारसंघांमध्ये

महाविकास आघाडीतील दोन घटक पक्षाच्या उमेदवारांनी एकाच मतदारसंघातून एबी फॉर्मसह अर्ज दाखल केल्याने शुक्रवारी एकच खळबळ उडाली होती. राष्ट्रवादी काँग्रेस शरद पवार गटाने शनिवारी या मतदारसंघातून उमेदवार जाहीर केली. आता शिवसेना यावर काय भूमिका घेते याकडे सर्वांचे लक्ष लागले आहे 

शिवसेना पक्ष उद्धव ठाकरे गटाकडून माजी आमदार दिवंगत ज्ञानेश्वर पाटील यांचे चिरंजीव रणजीत पाटील यांची उमेदवारी निश्चित केली होती. त्यांना पक्षप्रमुख उद्धव ठाकरे यांनी एबी फॉर्म सुद्धा दिला होता. तर राष्ट्रवादी काँग्रेस पक्ष शरद पवार गटांकडून माजी आमदार राहुल मोटे यांना देखील पक्षाने एबी फॉर्म दिला होता. मोटे यांनी काल शुक्रवारी) आपला उमेदवारी अर्ज एबी फार्मसह दाखल देखील केला होता. एकाच मतदारसंघात महाविकास आघाडीचे दोन उमेदवार निश्चित झाल्याने जिल्ह्यामध्ये संभ्रमाचे वातावरण निर्माण झाले होते.

रणजीत पाटील शिवसैनिकांच्या भूमिकेकडे लक्ष

परंडा भूम विधानसभा मतदार संघातून रणजीत पाटील हे उमेदवारीसाठी इच्छुक होते. तसं त्यांना पक्षाने एबी फॉर्म देखील दिला होता. परंतु अचानक निर्णय बदलल्याने आता ते कोणता निर्णय घेतात ते पाहावे लागेल. तसेच परंडा भूम वाशी या तालुक्यातील शिवसेना पक्ष उद्धव ठाकरे गटातील शिवसैनिक कोणती भूमिका घेतात हे देखील पुढील काही दिवसात दिसून येईल.

रणजीत ज्ञानेश्वर पाटील यांना पक्षप्रमुख उद्धव ठाकरे यांनी एबी फॉर्म देऊन उमेदवारी जाहीर करतात माजी आमदार राहुल मोटे काय निर्णय घेतात याकडे सर्वांचे डोळे लागले होते. ते बंडखोरी करतात की वेगळी चुल मांडतात याकडे सगळ्यांच्या नजरा होत्या पण काल राहुल मोटे यांनी एबी फार्मसह उमेदवारी दाखल केल्याने आघाडीत बिघाडी होते की काय अशी परिस्थिती निर्माण झाली होती. या मतदारसंघातील महाविकास आघाडीचा नेमका उमेदवार कोण हेच निश्चित होत नव्हते. आज त्यावर तोडगा निघाला असून प्रदेशाध्यक्ष जयंत पाटील यांनी राहुल मोटे यांचे नाव निश्चित केले आहे.